एजेन्सी, ११ साउन । अमेरिकी राष्ट्रपति डोनाल्ड ट्रम्पले कम्बोडिया र थाइल्यान्डको सीमा विवाद अन्त्यका लागि आफूले वार्ता गरिरहेको बताएका छन् ।
स्कटल्याण्डको भ्रमणमा रहेका ट्रम्पले आफ्नै लगानीको सामाजिक सञ्जाल ट्रुथ सोसल नेटवर्कमा लेखेका छन्, “थाइल्यान्डसँगको युद्ध रोक्ने सन्दर्भमा कम्बोडियाका प्रधानमन्त्रीसँग भर्खरै कुराकानी भएको छ ।”
“मैले थाइल्यान्डका कार्यवाहक प्रधानमन्त्रीसँग भर्खरै कुरा गरेको छु र यो कुराकानी निकै राम्रो भएको छ,” उनले पछिल्लो पोस्टमा भनेका छन्।
“कम्बोडियाजस्तै थाइल्यान्ड पनि तत्काल युद्ध विराम र शान्ति चाहन्छ,” उनले भने ।
उनले थपे, “अब म कम्बोडियाका प्रधानमन्त्रीलाई त्यो सन्देश दिनेछु । दुवै पक्षसँग कुरा गरिसकेपछि युद्ध विराम, शान्ति र समृद्धि स्वाभाविक देखिन्छ । हामी चाँडै यसलाई देख्नेछौँ!”
स्थानीयले रबर र धान खेती गर्ने खेतीयोग्य जमिन र पहाडले घेरिएको जङ्गली र देशको ग्रामीण सीमा क्षेत्रमा युद्ध फैलनुअघि सिमानामा लामो समयदेखि विवादित प्राचीन मन्दिर स्थलहरूमा तनाव उत्पन्न भएको थियो।
थाइल्यान्डको खाडीमा मुख्य फ्रन्टलाइनबाट करिब २सय ५० किलोमिटर दक्षिण पश्चिममा पर्ने तटीय क्षेत्रमा शनिबार तेस्रो दिन झडप सुरु भएको हो ।
ट्रम्पले भने, “म एक जटिल परिस्थितिलाई सरल बनाउने प्रयास गर्दैछु ! यो युद्धमा धेरै मानिस मारिएका छन् । यसले मलाई पाकिस्तान र भारतबिचको द्वन्द्वको सम्झना गराउँछ, जुन सफलतापूर्वक रोकिएको थियो।”
ट्रम्पले युद्ध नरोकिएसम्म कुनै पनि देशसँग व्यापार सम्झौतामा अघि नबढ्ने सङ्केत पनि दिएका छन् ।
प्रतिक्रिया दिनुहोस्