आज इतिहासको नयाँ सुरुवातको दिन हो : रवि लामिछाने

काठमाडौँ, २३ भदौ । सहकारी बचत अपचलन मुद्दामा नख्खु कारागारमा रहेका रवि लामिछानेले युवा पुस्तालाई आज हुने सडक प्रदर्शनलाई इतिहासको नयाँ सुरुवातको अवसरको रूपमा लिँदै सचेत, विवेकपूर्ण र सक्रिय रहन आह्वान गरेका छन् ।

लामिछानेले आइतबार निजी सचिवालयमार्फत जारी गरेको सन्देशमा भनेका छन्, ‘प्रिय जेन्जी, भोलि तपाईँहरू सडकमा ओर्लँदै हुनुहुन्छ । धेरैको लागि यो पहिलो प्रदर्शन हुन सक्छ । शासकहरूले तपाईँहरूसँग विधि र विवेकको शासन दिएनन्, सामाजिक सञ्जालको सानो ठाउँ पनि खोसे। तर तपाईँहरूको विवेक र आवेगसँग देशको इतिहास बदल्ने शक्ति छ ।’