काठमाडौँ, ३ असोज । युक्रेनबाट दुईजना नेपालीको उद्धार गरिएको छ ।
परराष्ट्र मन्त्रालयद्वारा जारी विज्ञप्तिमा भनिएको छ, “युक्रेनको सीमामा हिरासतमा रहेका दुईजना नेपाली (रौतहटका जय प्रकाश साह र बाग्लुंगका सन्देश केसी)लाई बर्लिनस्थित नेपाली दूतावासको समन्वय एवं सक्रियतामा उद्धार गरी आज अपराह्न नेपाल फर्काइँदै छ,”।
परराष्ट्रले विज्ञप्तिमा उद्धार कार्यमा सहयोग गर्ने युक्रेनको सीमा सुरक्षा सेवा कार्यालय, गैरआवासीय नेपाली संघ, जर्मनी र अन्य निकाय/व्यक्ति/सरोकारवालाहरूलाई धन्यवाद दिएको छ ।
विदेश यात्रा गर्दा सम्बन्धित मुलुकको अध्यागमनलगायत अन्य कानुनको पूर्णपालना गर्न परराष्ट्रले आग्रह गरेको छ ।
सम्बन्धित मुलुकको कानुनको उल्लंघन वा अवज्ञा अथवा बेवास्ता गर्दा पक्राउ परिने र लामो समय थुनामा बस्नुपर्ने अवस्था आउने एवं ज्यान समेत जोखिममा पर्नसक्ने परराष्ट्रले जनाएको छ ।
“यसप्रकार पक्राउ परेकाहरूको उद्धार प्रकृया पनि असहज हुने गरेको अनुभव छ । तसर्थ, विभिन्न प्रकारका प्रलोभन र बहकाउका सम्बन्धमा सचेत हुन र यस्ता कुनै पनि कार्यमा संलग्न नहुन सम्बन्धित सबैलाई अनुरोध गर्दछौँ,” परराष्ट्रले विज्ञप्तिमा भनेको छ ।
प्रतिक्रिया दिनुहोस्