यी हुन् बागमती प्रदेशमा एमालेका उम्मेदवार

काठमाडौँ, ४ माघ । फागुन २१ गते हुने प्रतिनिधिसभा निर्वाचनका लागि एमालेले बागमती प्रदेशको ३३ निर्वाचन क्षेत्र मध्ये अधिकांशको उम्मेदवार टुङ्ग्याएको छ । एमालेले बागमती प्रदेशका १३ जिल्लाका ३३ निर्वाचन क्षेत्र मध्ये केही बाहेक सबैमा उम्मेदवार छनौट गरेको हो । 

एमालेले छनौट गरेका उम्मेदवारमा केही नयाँ अनुहारलाई अवसर दिएको छ भने प्रदेश सभा सांसद समेतको नाम समावेश छ । १० निर्वाचन क्षेत्र रहेको काठमाडौँमा एमालेले ४ क्षेत्र बाहेकका सबैमा उम्मेदवार टुङ्ग्याएको छ । काठमाडौँ–१ मा मोहन रेग्मी, काठमाडौँ–२ मा मणिराम फुयाँल, काठमाडौँ–३ मा रामेश्वर फुयाँल, काठमाडौँ–६ मा अमनकुमार मास्के, काठमाडौँ–८ मा राजेश शाक्य, काठमाडौँ–१० मा विनोद श्रेष्ठ उम्मेदवार हुने भएका छन् । काठमाडौँ–४, ५, ७ र ९ को उम्मेदवार भने अध्यक्ष ओलीले टुङ्गाउने गरी राखेका छन् ।

ललितपुरको ३ क्षेत्र मध्ये ललितपुर–१ मा चेतनाथ सञ्जेल, ललितपुर–२ मा प्रेमबहादुर महर्जनलाई उम्मेदवार बनाएको छ । ललितपुर–३ भने अध्यक्ष ओलीले टुङ्गाउने गरी राखेका छन् । भक्तपुर–१ मा पनि एमाले अध्यक्ष ओलीले उम्मेदवार टुङ्ग्याउने गरी छाडिएको छ भने भक्तपुर–२ मा महेश बस्नेत उम्मेदवार बन्नेछन् ।

सिन्धुली क्षेत्र नम्बर १ बाट प्रदीप केसी (कटुवाल), सिन्धुली–२ मा मनोजजंग थापालाई टिकट दिएको छ । एमालेबाट रामेछापमा माधवप्रसाद ढुङ्गेल उम्मेदवार बन्ने निश्चित भएको छ भने दोलखामा पार्वत गुरुङ, सिन्धुपाल्चोक–१ मा आङदोर्जे शेर्पा र सिन्धुपाल्चोक–२ मा शेरबहादुर तामाङ उम्मेदवार बन्नेछन् । 

काभ्रेको क्षेत्र नम्बर–१ मा अमित लामा उम्मेदवार बन्दा काभ्रे–२ मा भने उम्मेदवार टुङ्ग्याउन सकेको छैन । सो क्षेत्रको उम्मेदवार एमाले अध्यक्ष केपी शर्मा ओलीले टुङ्ग्याउने गरी राखिएको छ । सो क्षेत्र एमाले नेता गोकुल बास्कोटा चुनाव लड्दै आएको क्षेत्र हो ।

एमालेले धादिङ– १ मा भूमि त्रिपाठी र धादिङ–२ मा धनबहादुर घलेलाई उम्मेदवार बनाएको छ । नुवाकोट–१ मा बद्री मैनाली, नुवाकोट–२ मा केशवराज पाण्डे, रसुवामा प्रेमबहादुर तामाङ उम्मेदवार बन्ने भएका छन् । मकवानपुर–१ मा रामेश्वर राना, मकवानपुर–२ मा महेश बर्तौला, चितवन–१ मा कृष्णराज (कमल) पाठक, चितवन–२ मा अस्मिन घिमिरे र चितवन–३ मा शंकरराज थपलियालाई एमालेले टिकट दिएको छ ।