निजी तथा सरकारी सम्पत्ति जलाउनेलाई कार्वाही गर्ने समय आउँछः अध्यक्ष ओली

झापा, ६ माघ । नेकपा (एमाले) अध्यक्ष केपी शर्मा ओलीले भदौ २४ मा जलाइएका आफ्नो बासस्थान, सकारी भवनका अबलोकन गर्नुभएको छ । झापा–५ आफ्नै निर्वाचन क्षेत्र अन्तर्गत पर्ने दमक नगरपालिका, ईलाका प्रहरी कार्यालय, आन्तरिक राजश्वको कार्यालय मंगलबार अवलोकन गर्नु भएको थियो ।

अध्यक्ष ओलीले ३० वर्षअघि आफैले बनाएको घर अवलोकन गर्नु भएको थियो । उक्त घर बेचबिखन गरिसक्नु भएको थियो । तर ओलीले बनाएको घर भनि जेनजी समूहले भदौ २४ गते आगो लगाईदिएका थिए । ‘राधिकाको सञ्चय कोषबाट ७ लाख झिकेर ३० वर्षअघि बनाएको घर हो’, आफ्नो पुरानो घरको कोठामा पुगेर ओलीले भन्नुभयो ।

संयोगले सोही घरमा ३० वर्षअघि ओलीले प्रयोगमा लिएको पलङ जल्नबाट बचेको छ । त्यो समयमा पलङलाई २ हजार रुपैयाँ परेको उहाँले बताउनु भयो । त्यस्तै दमक नगरपालिकाका प्रमुख राम थापाको जलेपछि भत्काएको घरको समेत अध्यक्ष ओलीले अबलोकन गर्नुभएको थियो । ‘आइदिनु भयो विशेष धन्यवाद । मेरो घर जलेपछि शरिरमा भएका कपडा बाहेक सबै जलेको हो’, नगर प्रमुख थापाले ओलीसँग भन्नुभयो ।

जेन जी आन्दोलनमा जलाइएको आफ्नो निर्वाचन क्षेत्रमा आउँदा बस्ने आवासको अध्यक्ष ओलीले अवलोकन गर्नुभएको थियो । ‘निजी तथा सरकारी सम्पत्तिलाई तोड्फोड, आगजनी गर्नेलाई कार्वाही गर्ने समय आउँछ’, उहाँले बताउनु भयो । अध्यक्ष ओलीले नगर कमिटी पार्टी कार्यालयको अबलोकन गर्नुभएको थियो ।