वर्तमान सरकारले देशको अर्थतन्त्र लयमा ल्याउन सक्दैन : उपाध्यक्ष पौडेल

काठमाडौँ, ९ असोज । नेकपा एमालेका उपाध्यक्ष एवम् पूर्वअर्थमन्त्री विष्णुप्रसाद पौडेलले वर्तमान सरकारको नेतृत्वले देशको अर्थतन्त्र लयमा ल्याउने सम्भावना नभएको बताएका छन् ।

मंगलबार काठमाडौंमा नेपाल उद्योग व्यवसायी महासंघले आयोजना गरेको अन्तरक्रिया कार्यक्रममा बोल्दै पूर्वअर्थमन्त्री पौडेलले यस्तो बताएका हुन् । वर्तमान सरकारले अर्थतन्त्रको वर्तमान समस्या समाधानको लागि जतिसुकै कुरा र प्रयास गरे पनि सरकारले अर्थतन्त्रका समस्या बुझ्न र समाधनका निम्ति नीतिगत वा व्यवहारिक निर्णय गर्न नसक्ने उनको दाबी छ । उनले देशको अर्थतन्त्रलाई ठिक दिशामा लैजाने संकल्प गर्ने काम वर्तमान सरकारले अहिलेसम्म गर्न नसकेको बताए ।

उनले भने, ‘नेपालको अर्थतन्त्र सुधार हुँदै गएको भन्ने दाबी सरकारको छ त्यो वास्तविकतामा आधारित छैन । उत्पादन छैन । आयात छैन । निर्यात, माग, सप्लाई र रोजगारी पनि छैन । अफ्ठ्यारो अवस्थामा पनि अर्थतन्त्र लयमा थियो । अहिले अर्थतन्त्र दुरावस्थामा आएको छ । समस्या आउनुको कारण निराकरण नगरी अर्थतन्त्रको समस्या समाधान हुन सक्दैन ।’