प्रधानमन्त्रीद्वारा पुँजीगत खर्च गर्न नसक्ने अवस्थाको अन्त्य गर्न निर्देशन

काठमाडौँ, १५ चैत । प्रधानमन्त्री पुष्पकमल दाहाल ‘प्रचण्ड’ले हरेक आर्थिक वर्षमा बजेट माग्ने तर पुँजीगत खर्च गर्न नसक्ने अवस्थाको अन्त्य गर्न निर्देशन दिएका छन् ।

आज सिंहदरबारमा राष्ट्रिय विकास समस्या समाधान समितिको ५२औँ बैठकमा प्रधानमन्त्री प्रचण्डले ‘पुँजीगत शीर्षकमा विनियोजित बजेट किन खर्च हुँदैन ?’ भनी प्रश्न गरे ।

उनले भने, “चालु आर्थिक वर्षको पहिलो ६ महिनामा सरकारको पुँजीगत खर्च समग्रमा कम रहनु हाम्रो लागि चिन्ताको विषय हो,” “ पुँजीगत शीर्षकमा विनियोजन भएको सबै बजेट पूरा खर्च नहुने अवस्था हरेक वर्ष दोहोरिने बारेमा गम्भीर भएर सोचौँ । यो समस्याको समाधान यस आवको बाँकी अवधिमा गर्नैपर्छ ।” उपलब्ध बजेट पूर्ण रूपमा खर्च हुने गरी विकास निर्माणका कार्यको नेतृत्व गर्न उनले सबै मन्त्रीहरूलाई निर्देशन दिए ।